الأربعاء، 17 سبتمبر 2008

مزاجنجي



عقل صناعي عقل بلاستيك
عقل وشغال بالشقلوب
عمة وطاسة وجسم ممدد
لما في ثانية بشمه يدوب
حتى جماله الغايب عنا
استأذنا في لفه اسكوب
ولا الماشية ..ماشية وقاعدة
زحفة وتنية وزقة يادوب

أكره قوي كل ملا محه
لما في بؤه حاططلي سيجارة
وأتخيل عينه وملامحه
زايغة وعوجة في قاعدة زبالة
أبعد وشي ..أمشي وأهشه
بره الشقة ..بره الحارة
شكله محشش .. شكله ينرفز
مسنود ع الحيطة اللي ورايا
طب أجري وطبطب
يمكن يعقل ولا استنى شوية يفوق ؟
عقل صناعي عقل بلاستيك
عقل وشغال بالشقلوب .


وسط الناس التايهة تملي
قاعد زابط لاي الشيشة
والحجر العثمانلي اتزين
يجي ميت مرة بتمن حشيشة
وما الحلوة عليه بتميّل
يمسك قلبه قال حبوب
عقل صناعي عقل بلاستيك
عقل وشغال بالشقلوب


ماشي يغني .. عيني يالاللي
يقعد حبة وحبة يقوم
ناسي معاد الشغل يا فندي
داخل ظابط وقت النوم
راجع تايه وبيطوح
سكران طينة بن المصدوم
وما نديت اطلع يا منيل
راح في مكانه قوام مكبوب
عقل صناعي عقل بلاستيك
عقل وشغال بالشقلوب


أخرج بره أجيب كام بيضة
لجل ما أعمل أحلى فطار
أرجع ألاقي الشقة حريقة
صاحي يدخن قال محتار
خايف يرجع شغله يلاقي
صنقر ناوي بأخد التار
أصرخ وألطم بعد ما ولول
وأسأل يمكن سمعي ضعيف
تار إيه دا ياعين أمك قولي
ريح قلبي أنا قلبي خفيف
يضحك فاتح بؤه الأصفر
قالي نسيت أديله الساعة
عهد وبايت كل ما بسكر
أرهن ساعتي قوان مغصوب
عقل صناعي عقل بلاستيك
عقل وشغال بالشقلوب


أنا هجري وطبطب
شكله هيعقل
عينه بتدمع دمع حزين
هاخده في حضني أضمه وسمي
أرقيه من شر الفاسدين
وانسى الماضي ده كله أكنه ماكان محسوب
عقله رجع بيفكر تاني
عقل طبيعي عقل رجالي عقل مظبط
مش مقلوب

ليست هناك تعليقات: