الجمعة، 22 أغسطس، 2008

صندوق الدنيا


بص معايا في وسط الدنيا
شاب بيبكي وحلمه معاه
يسعى مابين حواديت الدنيا
طهقان الشاب يا ولداه
يرمي ودانه ع البيانو لا
يحشر عينه في الصندوق
ينسى هموم الدنيا في ثانية
يسمع م اللي فاتوها تروق
في سنين الزمن المنسية
زوزو وعسلة صبحي وقرقر
وأبو الشوق
لما اتكهرب جاله جنان
خدمه وصار في الزواية مقام
اللي يزوره بلمسه يروق

بص ودقق في العنوان
ع الليفطة فوق الدكان
عطار السيد مرزوق
مش دي الليفطة اللي
في أيامنا مكتوب فوقها
يورو نت ملك سعاد وسمير
وجانيت أحفاد السيد مرزوق؟

بص ودقق تاني هناك
ع اللمة اللي مكانها مكانك
مش دي اللمة اللي في أيامنا
تجمهر حاد
أهو مولد وأهو صاحبة مسانده
بالحكم اللي مزاجه فساد
ولا إكمن الرنة دي كانت
جهل ومش رنة إضراب
مدد مدد مدااااااااد
اوعى تحرك عينك عنها
وتحسس على كتفك فوق
ضربة ونزلت مش في مكانها
من بوح الصوت المخنوق
وارجع واحشر عينك تاني
في الصندوق
.بص .. شوف ..مش ده الشيخ
السامي العالي
طالع يخطب نازل يخطب
للنفس الحزنانة تروق
مش ده اللي في أيامنا مخاوي
إخوان الهدف المسروق
بيحرم على نفسه أغاني
إلا الست .. صوت الست
نازل من فوق .
دقق.. دقق ..دقق
إلحق ..إلحق ..إلحق
قبل مازمن النظرة يفوت
اطلع واركب في العربية
مدد رجلك فيها شوية
واهرب م الجو المخنوق
مش دي القعدة اللي في أيامنا
فوق رجلين الناس من فوق
والجو المخنوق في زمنا
مخنوق م القش المحروق

بص معايا ونظرك رايح
ع الشاب المليان أحلام
حاجز حته في طرف الشارع
بيركب ريحة وبرفان
اثبت عندك
ارشق فيها
مش دي الصورة
اللي انت عليها؟
طب غيرها
أو عدلها
واخرج عينك م الصندوق
وامشي معايا في نور الدنيا
بكره اللي اتعكر هيروق.
بكرة اللي اتعكر هيروق
.

الجمعة، 8 أغسطس، 2008

أطباق ديمقراطية

أطباق بتخبط في بعضهم
مع إنهم واقفين مظبوط
وكبايات جالسين في سكوت
والصوت يتكتك .


تك ... تك ... تك
من غيظها ولا سحابة صوت
وقلم حجارته خلصانة
مرشية بيه من أجل القوت
وعلم يا سيدي على الكتكوت
...
تك ...تك... تك
قفلوا اللجان وإدوني كمان
عريس حلاوة من أبو سحتوت
فرحت بيه ما أنا بنت بنوت
قلمي اللي كان ويايا
والباقي من مالي معايا
طبعا مفقود
عمال يعاند أوراقي
وكلامي والفكر الباقي
في الهوا بيفوت
وآلام بتنشر في عظامي
مع ان روحي معاندة الموت
عناد وكبر ديمقراطي
ديمقراطي ؟!
طب وقراطي في الكون
مفقود؟
طربيزة واسعة ودايرها
حقد مثالي في العين محطوط
والاسم أهلي وأحبابي
بنيّن في شق الكره بيوت
والكره رمزه ديمقراطي
والخير في ايد الغير مشحوت .
بقول ايه
أطباق بتخبط في بعضهم
مع انهم واقفين مظبوط.

شجرة جميز

شجرة جميز طرحت مشمش

شفتوش إزاي!!

الواد بن اختي المدندش

توّك راح جاي

وجايبلي عيال

من غير شبشب

يا حلالي يا حلال

أكلم

شبعم

بعدين مشيم

وأخدت معاي

حبة جميز

يوه حبة مشمش

معلهش

أصلني نساي

على عتبة

بيتنا المتكرمش

الواد راح جاي

الواد راح جاي كده يتوجع

أ يا بطني ياناااااي

خدته ع الوحدة اللي

حدانا

والناس طوابير

والواد يتألم

ياضناية

والصبر قليل

ودخلت وشايله

على كتافي

كده طول الليل

وحكيم الوحدة

المتعافي

ندا إسمي ...جميل

يا جميل

إمبارك

الواد حامل

حامل !!

إزاي!!

لك عندي دليل

حامل فيروس

جايز .. يمكن
أهو جسمه نحيل

أو حاجة أكلها

ومغشوشة

أو مرشوشة

أو ميت زير

إيوّان

أهي شجرة جميز متمشمش

متلغمط طين

التين اتهرمن بالمشمش

طلع مشتين

الاثنين، 4 أغسطس، 2008

بياع البسبوسة


أنا بنت عم إبراهيم
بياع البسبوسة
على ناصية شارع الثورة
مصر المحروسة
أنا بنت عم إبراهيم
الراجل المسكين
السن في العشرين
والمهنة عروسة
على كتفي شايلة صواني
لفحاها نار الفرن
والهم والظلم
م القرع والكوسة
أبويا ناصب فرشته
على أول الناصية
ينادي بحروفها
والعيون قاسية
بااااسبوسة
يجري عليا الفقير
اللي ماداق الحلو
يمد إيده بقرش
أكمله بوسه
ونمشي على ناصية تانية
أركانها منحوسة
أعرفكم بنفسي؟
أنا بنت عم إبراهيم
الراجل الغلبان
الاسم والعنوان
بلا عنوان
قاعدين نراضي
في أهالي الناحية
ماحد يشتري منا
نظرنّا من الأركان
قاعدين ينادوا زينا
على شبشب الحمام
وصوت أبويا اللي اتقصف
أبريه أنا بصوتي
باااسبوسة .. باسبوسة يا مدام
***
صفارة واضحة في السمع
مخفية م العين
كل اللي سمعها جري
إلا إحنا الاتنين
قلبوا صنية البسبوسة
بلدية م الغربان
عيط أبويا وقال
والله " ده حرام"
أنا عم إبراهيم
الراجل الغلبان
ودي بنتي عروسة
وهجبلها فستان
كئن اللي كان بيلكمه
صخر
ضرب أبويا والدم والقهر
غطى على المكان
معدش في بسبوسة
ولا بكرة في فستان
أعرفكم بنفسي؟
أنا بنت عم إبراهيم
الراجل المجروح
الاسم والمهنة...
إنسان