الثلاثاء، 20 يناير، 2009

فرحة



أحلى فرحة لعام 2009 .. واضح إن العام سعيد .. ولإن ذكرياتنا للعام اللي فات بتحفظها الصور فلازم يكون عندنا نيجاتيف بس مش أي نيجاتيف .. " نيجايف يحيى قدري "


ألف مبروك يا يحيى على صدور ديوانك الأول " نيجاتيف "
الديوان ان شاء الله هينور معرض الكتاب

"موجود في معرض الكتاب عن سلسلةمطبوعات جماعة إضافة الثقافيةدار نشر المحروسة"


أوعدكم هتقروا لأحلى شاعر عامي حداثي في مصر .


بالزمة مش أحلى فرحة ؟


نيجاتيف

كل الصور اللي اتبقت
من فيلم قديم
مانتش فيها
فوق التسريحة
تحت إزاز الكومودينو
خرابيش صفرا
كاحتة الملمح
نيجاتيف بهتان
لوشوش سمرا
بعيون حمرا
كانت فاكرة إنها على طول باقية
وكإن ذنوب أيامك
أكتر م اللي تخلي الدنيا
جنة عليك
مستخسرة فيك الذكرى
يكفيك خرابيش
ع الوش اللي تشك إنه بتاعك
اكمنه بيهرب منك
باعك
ولا حدش يوم بيفكر
مين كان واقف
أخد الصورة




من قصيدة نيجاتيف ديوان " نيجاتيف " للشاعر " يحيى قدري ".

الثلاثاء، 6 يناير، 2009

معكوسة

حقيقي قرفت
قرفت امدلك إيدي
وانت عايشلي في الماضي
وكل ماشوف برود قلبك
أصرّخلك تقول..عادي


حقيقي انت مش عارف
ولا حاسس ولافاهم ولا شايف
إدين غيرك بتتحارب
لتلمسني
وروحي مدالك ايدها
ورافضها وعايزني!
تفسرلي؟
مابفهم ليه!
ملاكي شاريك?
شياطنهم قويه عليه
ما قلبي في السما عايش
وابليس فيها كان ايه ؟
ملاك واترمى بنا
بكلمة لأ
اقول انا آه ؟
وتقتلني شياطنهم
واجري عليك لتلحقني
الاقيك لسه في الماضي
شبح مكسور ودمعك
جاري ع الفاضي
خلاص .. خليك

كمان قلبي صبح رفضك
ورافضهم
وكتر الرفض قواني
ولو في القلب ليك عشقة
راح أقتلها
ومن تاني
أعيش اللحظة لحظتها
وأقول الكلمة اللي خبتها
ومقدرتش أقولها زمان
لكن معكوسة
حقيقي " كرهتك"