على حجر الدنيا

على حجر الدنيا حكاوي .. غناوي كتيرة . على حجر الدنيا وفي قلبها احلى شاعر عامي "محمد منصورصقر"

قريبا عن دار المحروسة للنشر بالاشتراك مع جماعة إضافة ديوان شعر عامي " على حجر الدنيا " للشاعر الجميل " محمد منصور صقر"

ألف مبروك يامحمد وعقبال الديوان المية

نجاح كبير ان شاء الله للديوان الرائع





على حِجر الدنيا
أنام واصحى
أسمع حواديت
عن حضن وبيت
وحصان أبيض
وابن الصياد يصبح فارس
للخير حارس
هازم أعاديه
سيفه البتّار
واقف زنهار
بيعِد غنايم م الأشرار
وحبيبته حوريّة من الجنه
بنت السلطان
بجمالها الكل بيتغنّى
تدعيله بنُصرَة فى كل أدان

وأدان الديك
يِدَّنْ .. وعاديك
أفتح عينى
ملقاش غير بوم
وغراب الشوم
عمّال ينعى

على دبح هابيل
اللى بيتكرر طول اليوم

على بنت انحلّت ضفايرها
بدون استئذان
وبدم شرفها بيتوضا
ابن السلطان

على واد فارس
بيجر الكارُّو بحصانه
مطلوب منه ينط حواجز
مبقاش عايز
مبقاش عايش
غير فى الحواديت
اللى سمعها
على حجر الدنيا

على حجر الدنيا غناوى كتير
أصوات مزامير
وزعيق ونفير
وحاجات بنلف فى جوّاها
راسمة متاهة
الشارع بيسلّم لطريق
ورفيق بيروح وبييجى رفيق
وبلاد من نور محاوطها ضلام
ناس رايحة وجايّة بترمى سلام
تبدأ بسلام
تختم بسلام
حبّة سلامات متعاصة كلام
حبّة خيالات
على حِجْر الدنيا